Category Archives: Educación primaria

25 N- Non sexas cómplice

Estándar

Un ano máis a profesora do CIFP Carlos Oroza de Pontevedra, Tareixa Casal, agasállanos con atractivos e interesantes materiais para abordar co alumnado de Secundaria, Bacharelato e Formación Profesional este doloroso e tráxico asunto da violencia contra as mulleres.
Todas e todos somos necesarios para evitar este sufrimento inxusto e ancestral.

Un libro para o 25N

Estándar

O libro narra a historia das irmás Mirabal que viviron na República Dominicana (Salcedo). Loitaron pola igualdade e contra as inxustizas. Foron asasinadas.

A data 25 de Novembro adoptada pola ONU como Día Internacional da eliminación da violencia contra a muller ten moito que ver con estas tres mulleres valentes e loitadoras.

Loitando contra a invisibilización

Estándar

Unha publicación: “XEAS: Mulleres que estudan a Terra”, dá voz a doce xeólogas de épocas diferentes.

A Comisión “Mujeres y Geología” da Sociedade Xeolóxica de España (SGE), a
“Asociación de Servicios de Geología y Minería Iberoamericanos” (ASGMI) e a “Federación
Europea de Geológos” (EFG) fixeron posible esta interesante publicación.

As mulleres e os coidados: “Eat Together/Comer xunt@s”

Estándar

Este é o argumento dun pequeno vídeo de algo máis de 2 minutos, realizado en Canada no ano 2017, que chama a nosa atención pola incomunicación que provocamos entre nós co uso excesivo das novas tecnoloxías. Unha vez máis, somos as mulleres as que poñemos enriba da mesa os coidados e, nunca mellor dito, porque xuntando ao redor dunha mesa aos veciños e veciñas dunha vivenda para compartir un xantar, podemos decatarnos do illamento no que vivimos en moitas ocasións.

“Oceánicas, pioneiras da oceanografía”

Estándar

O Consejo Superior de Investigaciones Científicas (CSIC) publica  o libro Oceánicas: pioneras de la oceanografía, en acceso aberto, unha edición ilustrada e dirixida ao público xuvenil que inclúe 20 biografías de científicas mariñas de todos os tempos: dende a primeira muller que deu a volta ao mundo durante a época das grandes exploracións, ata investigadoras que a día de hoxe lideran a loita pola conservación dos océanos.

As súas historias fálannos do desenvolvemento das ciencias mariñas os últimos séculos, pero tamén das dificultades ás que se enfrentaron as mulleres —na oceanografía, na ciencia e na vida— e da loita pola igualdade de moitas xeneracións.

A nova publicación de Editorial CSIC, de descarga gratuita, enmarcase no proxecto Oceánicas, unha iniciativa do Instituto Español de Oceanografía (IEO-CSIC) cuxo obxectivo é poñer en valor o papel da muller nas ciencias mariñas, recuperar historias de pioneiras esquecidas e xerar vocacións científicas en nenas e nenos a través de referentes femininos. 

Pódese ampliar información premendo en CSIC, coñecer o proxecto aquí e descargar o libro nesta ligazón Oceánicas.

No ano 2020, o Instituto Español de Oceanografía realizou un almanaque adicando cada mes a unha muller experta en Oceanografía. O calendario pode descargarse premendo nesta ligazón Calendario.

 

Comeza un novo curso: A igualdade nos centros educativos

Estándar

Pode que sexa un momento acaído este comezo do novo curso 2022-2023 para analizar a nosa situación e ser quen de mellorala. Con esta intención escribín este texto para o Nº 6 da revista de CLAVICO Claustro virtual de coeducación.

Certamente dispoñemos dalgunhas ferramentas no ámbito educativo para mellorar en coeducación pero mentres non se imparta en todas as etapas educativas unha Educación Sexual rigorosa, científica e non discriminatoria, entre outras medidas, non avanzaremos o suficiente.

Aí tedes a miña contribución e ao final podedes descargar o Nª6 da revista CLAVICO por se queredes ampliar información con outros traballos ben interesantes.

Podedes descargar aquí a revista CLAVICO

Guía Violencia de Xénero en menores de idade

Estándar

Despois de coñecer estes días os feitos tan arrepiantes sufridos durante 4 anos por unha menor de idade na cidade de Pontevedra, causados pola parella da súa nai, que foi condenado a 15 anos por agredir e violar de xeito continuado a esta menor, pensamos que estaría ben dotarnos de todas aquelas ferramentas que nos axuden a detectar e intervir nestes casos.

A Fundación ANAR ven de editar unha boa e moi útil guía para intervir con menores de idade vítimas da Violencia de Xénero, dirixida a familias, profesorado e persoas que traten a miúdo con crianzas e mocidade.

A Fundación ANAR é unha organización sen ánimo de lucro que axuda a nenos/as e adolescentes, desde 1970, e que se dedica á promoción e defensa dos dereitos dos nenos/as e adolescentes en situación de risco e desamparo, mediante o desenvolvemento de proxectos tanto en España como en Latinoamérica, no marco da “Convención de los Derechos del Niño de Naciones Unidas”. 

Podedes descargar aquí Guía Violencia de Género en menores de edad

Mulleres maltradas pola vida e pola historia

Estándar

Debemos contar a verdade e atribuirlles o valor que tiveron cada unha no seu tempo e na súa actividade. Neste pequeno vídeo, feito con humor e moi acaído para a xente moza, dásenos conta da importancia de seis mulleres, unhas máis coñecidas que outras, pero todas silenciadas dunha maneira ou doutra ao longo de séculos. Desde Cleopatra, raíña de Exippto (S I a. C.), a filósofa e científica Hipatia de Alexandría (SIV-V), a raíña Juana de Castilla, tristemente coñecida como “La loca” (S XV-XVI), Sofonisba a pintora máis famosa do Renacemento e mestra do retrato, Clara Campoamor, política e escritora que consegíu o dereito ao voto para as mulleres ou a famosa actriz Hedy Lamarr, silencida como creadora das conexiones por internet, que tivo que mudar o seu nome de nacemento, Hedwig Eva Mª Kiesler, ao vivir nos EEUU.

Podedes descargar aquí este vídeo Mujer tenías que ser

Para completar esta historia de silencios intencionados coa vida e a traxectoria de moitas mulleres, aquí tedes outro exemplo no acontecido coa fotógrafa estadounidense Ruth Matilda Anderson (1893-1983), recollido pola nosa amiga Luisa Fernanda Arís no seu blog https://mulleresehistoria.blogspot.com/2022/07/ruth-matilda-anderson.html, nunha recente entrada onde se fala da faciana desta importante muller como tradutora e divulgadora da cultura galega

A incontinencia urinaria nas mulleres. Unha desas enfermidades vergoñentas.

Estándar

“Considérase incontinencia urinaria a calquera perda involuntaria de urina a través da uretra. Esta patoloxía preséntase con maior frecuencia nas mulleres que nos homes, especialmente despois do embarazo, do parto ou da menopausa.
O obxectivo deste estudo é investigar o grao de coñecemento que ten unha mostra de mulleres enquisadas sobre a incontinencia urinaria.
Levouse a cabo unha enquisa anónima dirixida á poboación feminina cuxa idade está comprendida entre os 40 e os 60 anos e procedeuse a análise dos resultados obtidos.
Estes resultados amosan un escaso coñecemento en materia de incontinencia urinaria e, conclúese, que é necesario crear programas de formación para mulleres co fin de previr dita patoloxía e minimizar as súas consecuencias”. Con estas palabras comeza o TFG Traballo de Fin de Grao Incontinencia urinaria femenina, realizado pola enfermeira Marina Tilve Gallego hai agora un ano ao rematar os seus estudos.

Marina Tilve Gallego

É un deses traballos que deixan ben as claras a falta dunha perspectiva de xénero na Medicina, que “aínda non foi incorporada ás facultades e o alumnado remata os estudos sen acreditar nas diferenzas entre sexos na forma de ser, de enfermar ou nos efectos dos fármacos”. E, precisamente, por iso é de salientar este estudo e as súas conclusións, entre elas anotar que o  68,3% das mulleres apuntou que nunca recibira información relacionada con esta patoloxía e que segue a considerarse un tabú para a sociedade, a pesar de ser un problema que afecta de cheo a vida das persoas (unha de cada dúas mulleres) que a padecen, tanto a nivel físico como social e psicolóxico.

Para coñecer outros aspectos desta investigación, premede no título A incontinencia urinaria, artigo publicado no xornal NÓS Diario.

Podedes descargar o traballo completo en PDF “Incontinencia urinaria femenina”