Tag Archives: Biografías

Un libro para o 25N

Estándar

O libro narra a historia das irmás Mirabal que viviron na República Dominicana (Salcedo). Loitaron pola igualdade e contra as inxustizas. Foron asasinadas.

A data 25 de Novembro adoptada pola ONU como Día Internacional da eliminación da violencia contra a muller ten moito que ver con estas tres mulleres valentes e loitadoras.

Loitando contra a invisibilización

Estándar

Unha publicación: “XEAS: Mulleres que estudan a Terra”, dá voz a doce xeólogas de épocas diferentes.

A Comisión “Mujeres y Geología” da Sociedade Xeolóxica de España (SGE), a
“Asociación de Servicios de Geología y Minería Iberoamericanos” (ASGMI) e a “Federación
Europea de Geológos” (EFG) fixeron posible esta interesante publicación.

“Oceánicas, pioneiras da oceanografía”

Estándar

O Consejo Superior de Investigaciones Científicas (CSIC) publica  o libro Oceánicas: pioneras de la oceanografía, en acceso aberto, unha edición ilustrada e dirixida ao público xuvenil que inclúe 20 biografías de científicas mariñas de todos os tempos: dende a primeira muller que deu a volta ao mundo durante a época das grandes exploracións, ata investigadoras que a día de hoxe lideran a loita pola conservación dos océanos.

As súas historias fálannos do desenvolvemento das ciencias mariñas os últimos séculos, pero tamén das dificultades ás que se enfrentaron as mulleres —na oceanografía, na ciencia e na vida— e da loita pola igualdade de moitas xeneracións.

A nova publicación de Editorial CSIC, de descarga gratuita, enmarcase no proxecto Oceánicas, unha iniciativa do Instituto Español de Oceanografía (IEO-CSIC) cuxo obxectivo é poñer en valor o papel da muller nas ciencias mariñas, recuperar historias de pioneiras esquecidas e xerar vocacións científicas en nenas e nenos a través de referentes femininos. 

Pódese ampliar información premendo en CSIC, coñecer o proxecto aquí e descargar o libro nesta ligazón Oceánicas.

No ano 2020, o Instituto Español de Oceanografía realizou un almanaque adicando cada mes a unha muller experta en Oceanografía. O calendario pode descargarse premendo nesta ligazón Calendario.

 

Homenaxe a Anuncia Casado

Estándar

O pasado 21 de agosto a asociación “Os Torgueiros” organizou unha homenaxe a Anunciación Casado Atanes, máis coñecida polo alcume de “A Pasionaria” de Viana, sendo o 86 aniversario da súa morte, e a outras vítimas do fascismo na Terra das Frieiras.

Na última parte dos actos, as persoas asistentes desprazáronse á Casa da Viúva, na Gudiña, lugar onde os historiadores e investigadores Dionísio Pereira, David Simón e Lola Varela, presentados polo recoñecido etnógrafo gudiñés José Rodríguez Cruz, participaron nunha palestra moi interesante sobre a resistencia no 36, os represaliados e represaliadas, e a violencia exercida sobre as mulleres naquel agosto de 1936 e en adiante.

Anuncia Casado foi a responsable do Partido Comunista de España na comarca de Viana. Na Segunda República fixo propaganda entre os traballadores do ferrocarril da liña A Gudiña e Vilar de Barrio. Conta a súa historia Lola Varela en “Nós Diario”; pode lerse o artigo completo na seguinte ligazón Anuncia

Para máis información premer na entrada Anuncia Casado do blogue “Mulleres na Historia e Historias de mulleres“.

Mulleres maltradas pola vida e pola historia

Estándar

Debemos contar a verdade e atribuirlles o valor que tiveron cada unha no seu tempo e na súa actividade. Neste pequeno vídeo, feito con humor e moi acaído para a xente moza, dásenos conta da importancia de seis mulleres, unhas máis coñecidas que outras, pero todas silenciadas dunha maneira ou doutra ao longo de séculos. Desde Cleopatra, raíña de Exippto (S I a. C.), a filósofa e científica Hipatia de Alexandría (SIV-V), a raíña Juana de Castilla, tristemente coñecida como “La loca” (S XV-XVI), Sofonisba a pintora máis famosa do Renacemento e mestra do retrato, Clara Campoamor, política e escritora que consegíu o dereito ao voto para as mulleres ou a famosa actriz Hedy Lamarr, silencida como creadora das conexiones por internet, que tivo que mudar o seu nome de nacemento, Hedwig Eva Mª Kiesler, ao vivir nos EEUU.

Podedes descargar aquí este vídeo Mujer tenías que ser

Para completar esta historia de silencios intencionados coa vida e a traxectoria de moitas mulleres, aquí tedes outro exemplo no acontecido coa fotógrafa estadounidense Ruth Matilda Anderson (1893-1983), recollido pola nosa amiga Luisa Fernanda Arís no seu blog https://mulleresehistoria.blogspot.com/2022/07/ruth-matilda-anderson.html, nunha recente entrada onde se fala da faciana desta importante muller como tradutora e divulgadora da cultura galega

“Juana la loca”, e senon estaba tan tola?

Estándar

Para contribuir a mudar esa visión androcéntrica do noso pasado que nos transmitiron durante séculos, con este pequeno vídeo queremos visibilizar a unha muller maltratada inxustamente pola historia e devolverlle a súa dignidade. Como cambia o conto despois de saber como foi a súa vida!

Mulleres nas letras galegas

Estándar

Próxima a celebración do noso día das Letras, facemos unha pequena reflexión sobre a desproporción entre o número de mulleres e homes que recibiron a homenaxe de serlle dedicado ese 17 de Maio. Podemos velo premendo aquí.

Cómpre lembrar ás homenaxeadas ata a data e tamén reinvindicar as moitas achegas femininas ás Letras Galegas .

Pierre Curie, un home feminista

Estándar

Pierre e Marie Curie

Marie Sklodowska Curie, de orixe polaco e nacionalizada francesa, foi unha muller excepcional que, de non ser por Pierre Curie, o físico francés con quen casou, e algúns outros homes que ao longo da súa vida a trataron como unha igual, non chegaría a ser recoñecida no mundo científico como finalmente o foi. Ela xunto co seu home foron os descubridores da radioactividade e mereceron por iso o Premio Nobel de Física no ano 1903 conxuntamente, porque Pierre decidira rexeitar ese galardón se non era compartido con Marie.

Esta actitude igualitaria e feminista de Pierre abríulle a Marie moitos camiños a partir dese momento, aínda que todavía debeu superar moitos atrancos.

Foi a primeira muller en conseguir un Premio Nobel, a primeira persoa en conseguir dous, o de Física en 1903 e o de Química no ano 1911; a primeira licenciada en Física; a primeira catedrática da Universidade de Paris; a primeira Directora de Laboratorio na Sorbona; a primeira muller en entrar na Academia de Medicina; a primeira Premio Nobel en ter unha filla galardonada co mesmo premio; e tamén, a primeira muller en ser sepultada no Panteón de París.

E debemos engadir que fundou o Instituto Curie en París e en Varsovia.

No seguinte enlace (no nome de Marie Curie) tedes máis detalles da vida desta boa parella, contada con moito humor e desenfado, brevemente, pola xornalista Nieves Concostrina no programa Acontece que no es poco da cadena SER.

Marie Curie

As premiadas do “Cervantes”

Estándar

Tal día coma hoxe de fai 47 anos, para conmemorar o nacemento do escritor Miguel de Cervantes, é dicir, o 23 de abril de 1975, foi instituido o Premio Nacional de Literatura que vaise concedendo anualmente polo Ministerio de Cultura de España. Ao longo destes case 50 anos, só acadaron este galardón, o Premio Cervantes, 6 mulleres fronte a 41 homes.

A 1ª foi a filósofa e escritora española María Zambrano no 1988; a 2ª a escritora cubana e tamén avogada Dulce María Loinaz no 1992; a 3ª a catalana Ana María Matute no 2010; a 4ª a xornalista e activisara mexicana Elena Poniatowska no 2013; a 5ª a poeta uruguaia Ida Vitale no 2018.

A 6ª é a tamén escritora uruguaia Cristina Peri Rossi no 2021, que recibiu este ano o premio na Universidade de Alcalá de Henares.

Pódese ampliar información nesta ligazón Día do libro 2022.

Lembrando a Antía Cal

Estándar

Recentemente, o mércores 30 de marzo de 2022, ven de falecer en Vigo, con case 99 anos, a mestra e pedagoga galega Antía Cal.

O “Observatorio da Mariña pola Igualdade” e o Concello de Muras publicaron en 2015 a Unidade Didáctica “Antía Cal, educando iguais”  e un Díptico, sobre a pioneira da revolución pedagóxica en Galicia, Antía Cal.

A  UD está orientada para alumnado dos últimos cursos de Secundaria Obrigatoria así como ao de Bacharelato. Entre os obxectivos que busca destacan os de valorar e respectar a diferenza de sexos e a igualdade de oportunidades rexeitando os estereotipos de xénero, valorar a cultura e a historia propia e das demais persoas, así como o patrimonio cultural e histórico.

Salientar tamén que levou a cabo a introdución en Galicia de formas modernas de ensino, especialmente a través da Escola Rosalía de Castro, que fundou na cidade olívica en 1961. O colexio foi pioneiro na introdución do galego no ensino, e tamén do inglés, ademais de ser laico e mixto en plena ditadura.

Pódense descargar nas ligazóns, a UD e o Díptico explicativo sobre a vida e obra da “Tita do Mesón“.

Asemade no blogue “Mulleres na Historia e Historia de Mulleres” pódese atopar máis información premendo nesta seguinte ligazón Antía Cal.